चौतारा माध्यमिक विद्यालय नेपालको ओखलढुंगा जिल्लास्थित एक प्रतिष्ठित शैक्षिक संस्था हो, जसको स्थापना वि.सं. २०४५ सालमा भएको हो। साविक मुलखर्क गाविस वडा नं. २ मा अवस्थित यस विद्यालयको नाम “डाँडाखर्क” क्षेत्रमा यात्रु तथा सर्वसाधारणले विश्राम लिन निर्माण गरेका ऐतिहासिक चौताराहरूबाट प्रेरित भएर राखिएको हो। विगतमा कटारी क्षेत्रबाट नुन बोकेर आउने बटुवाहरूले यही स्थानमा भारी बिसाउने तथा विश्राम गर्ने गर्दथे, जसले यस स्थानलाई ऐतिहासिक तथा सामाजिक दृष्टिले विशेष महत्व प्रदान गरेको छ। विद्यालय स्थापनाको प्रारम्भिक चरणमा संस्थापक अध्यक्ष दिलबहादुर खत्रीले २ रोपनी जग्गा दान गरी विद्यालय निर्माणको थालनी गर्नुभएको थियो। स्थापना कालमा विद्यालय डाँडाखर्कमा सञ्चालन गर्ने वा ऐसेलुखर्कमा भन्ने विषयमा विवाद भए पनि स्थानीय समुदायको सहकार्य र सकारात्मक निर्णयपछि विद्यालयले द्रुत गतिमा विकासको यात्रा अघि बढाएको हो। सुरुवाती समयमा कक्षा ५ सम्म सञ्चालन भएको विद्यालयमा वि.सं. २०५२ सालमा संस्थापक अध्यक्ष दिलबहादुर खत्रीको विशेष पहलमा कक्षा ६ सुरु भई क्रमशः कक्षा ८ सम्म विस्तार गरिएको थियो। त्यसैगरी उहाँकै अग्रणी भूमिकामा वि.सं. २०६५ सालमा कक्षा ९ र वि.सं. २०६६ सालमा कक्षा १० सञ्चालनमा आएको हो। शैक्षिक गुणस्तर, अनुशासन तथा समर्पित शिक्षण पद्धतिका कारण विद्यालयले स्थानीय स्तरमा उत्कृष्ट पहिचान बनाउँदै आएको छ। वि.सं. २०७८ सालदेखि विद्यालयमा कक्षा ११ सञ्चालनका साथै प्राविधिक शिक्षा तथा व्यावसायिक तालिम परिषद् (CTEVT) बाट सम्बन्धन प्राप्त गरी डिप्लोमा इन कम्प्युटर इन्जिनियरिङ कार्यक्रम सफलतापूर्वक सञ्चालन भइरहेको छ। हाल माध्यमिक तह (कक्षा ११–१२) मा विज्ञान तथा शिक्षा संकाय सञ्चालनमा रहेका छन्। विद्यालयसँग सुनकोशी गाउँपालिका–५ मा आफ्नै नाममा ३३ रोपनीभन्दा बढी क्षेत्रफलमा फैलिएको जग्गा रहेको छ। विद्यालय परिसरमा भूकम्प प्रतिरोधी १३ कोठे सुविधा सम्पन्न ३ वटा आधुनिक भवन, २ वटा पुराना भवन, छात्र तथा छात्राका लागि छुट्टाछुट्टै शौचालय तथा स्वच्छ खानेपानीको व्यवस्था रहेको छ। विद्यार्थीहरूको सर्वाङ्गीण विकासलाई ध्यानमा राख्दै विद्यालयमा सुविधा सम्पन्न पुस्तकालय, आधुनिक कम्प्युटर ल्याब, विज्ञान प्रयोगशाला तथा प्रविधिमैत्री शिक्षण सिकाइका लागि इन्टरनेट सुविधा उपलब्ध गरिएको छ। गुणस्तरीय शिक्षा, प्रविधिमैत्री वातावरण र सक्षम जनशक्ति उत्पादन गर्ने लक्ष्यसहित विद्यालय निरन्तर शैक्षिक उन्नतितर्फ अग्रसर रहेको छ।